سلفتي مش بتحب السمك

يوسف نفض رجله من إيدها بعنف، وصوته علي بهستيريا: تفرحي بإيه يا بجحة؟! بوجع قلبي؟ بلهفتي على ضنا بقالي أربع سنين بدعي بيه في كل سجدة؟! انتي تتاجري بوجعنا وبكسرة قلبنا عشان حقد نسوان وكيد عمى؟! دا أنا كنت مستعد أبيع هدومي عشان أدفع مصاريف الدكاترة ومثبتات الحمل اللي بتشحتيها! حماتي حاولت تتدخل، وصوتها كان بيرجف بس فيه مكابرة: يا يوسف يا ابني، اهدى، الست لما بتتحرم من الخلف بتعمل أي حاجة، هي كانت متضايقة وغلطت، عديها عشان خاطر…

يوسف لف لأمه وبصلها بنظرة عمري ما شوفتها في عيني ابن لأمه: أعدي إيه يا أمي؟! وانتي كنتي عارفة؟ انتي كنتي عارفة إنها بتكذب وشاركتي في الفيلم ده؟ جيتي تقولي لطارق خلو بالكم منها وخلوا إيمان تخدمها؟! انتي ترضي حد يعمل كده في بناتك؟! ترضي بنتك تبقى قاعدة مخدومة بالكذب ومسخرة سلفتها وبتضحك عليها وعلى جوزها؟! حماتي سكتت، ملقتش كلمة واحدة ترد بيها، حطت وشها في الأرض وهي بتتنفس بسرعة وعكازها بيخبط في السجادة برعشة إيدها.

أنا وقفت قدامهم كلهم، وقولت بكل هدوء وبنبرة مفيهاش أي تردد: أنا حقي جه قدام ربنا وقدامكم كلكم. وعشان تبقوا عارفين، أنا لا بلغت بوليس، ولا شيرت التسجيل ده عند حد، ولا فضحتم في العمارة زي ما كنتوا ناويين تفضحوني وتقولوا سقطت بسببي. أنا بنت ناس ومتربية، وبعرف أصون البيت اللي دخلته حتى لو أهله ما صانوش كرامتي.

بصيت لسارة وقولت: انتي يا سارة، ليكي رب يحاسبك على النعمة اللي بتلعبي بيها وبتكدبي باسمها، وأنا ماليش دعوة بيكي من اللحظة دي، لا ليكي سلام عندي ولا كلام، وشقتك دي عتبتها محرمة عليا ليوم الدين، لو شوفتك ماشية على السلم قدامي، هعتبر نفسي شايفة هوا. وبعدين لفيت لحماتي: وانتي يا ماما، كنت بحترمك زي أمي وبشيلك على راسي، بس اللي يرضى لمرات ابنه الإهانة ويساعد في كسرها عشان خاطر التانية، يبقى معندوش عدل. بيتك مفتوح لعيالك، لكن أنا كفايتي من المجاملات لحد هنا، مش هتشوفي مني قلة أدب، بس برضه مش هتشوفي مني الود القديم.

وأخيرًا، بصيت لطارق. طارق كان واقف زي التايه، بصلي وعينيه مليانة ندم واعتذار: إيمان… أنا مكنتش أعرف، أنا أسف، حقك عليا، أنا كنت فاكر… قاطعته بحزم: انت كنت فاكر إني أنا الحيطة المايلة يا طارق. كنت دايمًا تطلب مني أنا اللي أضحي، أنا اللي أستحمل، أنا اللي أعدي عشان المركب تسير، لحد ما المركب داست على كرامتي وكسرتني. لو انت شايف إن رجولتك تسمح إن مراتك تتهان ويتضحك عليها وانت تقف ضدي، يبقى إحنا ملناش عيشة مع بعض.