سلفتي مش بتحب السمك

حكايات مني السيد حصري سلفتي مش بتحب السمك خالص، أو بالأصح بتقرف من ريحته جدًا، وكل مرة أعمل فيها سمك في البيت كانت لازم تعمل مشكلة. كانت أول ما تشم الريحة تقول إحنا بنقرف منه، ومش بنحب ريحته هو لازم كل شوية سمك؟ في الأول كنت بزعل، لأن أنا وجوزي وعيالي بنحب السمك جدًا، وعيالي بالذات كانوا بيفرحوا لما يعرفوا إن الغدا سمك. ومش معنى إنها مش بتحبه إن البيت كله يحرم منه. بس عشان ما أعملش مشاكل، قلت لها مرة خلاص يا حبيبتي، لما تروحي عند والدتك ابقي قوليلي، وأنا أعمل السمك في اليوم ده، وأهو كل واحد يبقى مرتاح. وفعلًا، بقت لما تروح عند أمها، أنا أستغل اليوم وأعمل السمك وأنا مرتاحة. كنت بحاول على قد ما أقدر أراعيها، رغم إن محدش طلب مني ده. لحد يوم ما قالتلي إنها رايحة عند أمها. وأنا كنت عارفة إنها كل مرة بتقعد هناك لحد بالليل، فقلت خلاص، النهارده فرصة أنا تعبانة ومش قادرة أطبخ كتير، أعمل سمك والعيال تفرح. نزلت جبت السمك، ونضفته، وحطيته على النار. والريحة بدأت تنتشر في البيت، والعيال كانوا واقفين حوالين المطبخ مستنيين الأكل. حصري على صفحة روايات و اقتباسات كنت لسه بحط السلطة على السفرة، وفجأة سمعت صوت المفتاح في الباب. بصيت ناحية الباب لقيت سلفتي داخلة! اتوترت وقلت إنتِ رجعتي بدري؟ ما لحقتش حتى ترد، لأنها أول ما شمت ريحة السمك، وشها اتغير. وقفت على باب شقتي وقالت بصوت عالي إنتِ ما عندكيش دم؟! مش بتفهمي؟! بصيت لها باستغراب في إيه بس؟ قالت بعصبية أنا بروح عند أمي مخصوص عشان ما أشمش ريحة السمك، وإنتِ مستنياني لما أروح عشان تعمليه؟! أرجع ألاقي البيت كله ريحته سمك! قولتلها بس أنا ما كنتش عارفة إنك هترجعي بدري، وبعدين أنا أصلًا كنت بعمله وإنتِ مش موجودة. قالت ولو عايزة تاكليه، اشتريه من بره وكليه بره! لكن ما تعمليهوش في البيت. هنا بقى اتضايقت فعلًا. مش عشان السمك لكن عشان حسيت إن الموضوع خرج من كونه مجرد مراعاة وبقى تحكم. قولتلها أنا راعيتك من البداية، وكل مرة كنت بستنى لما تروحي عشان أعمله، لكن إنك تدخلي بيتي وتقوليلي أطبخ إيه وما أطبخش إيه، ده مش مقبول. أنا وعيالي بنحب السمك، ومن حقي أعمل الأكل اللي إحنا بنحبه في بيتي. صوتنا علي، وهي بدأت ترد عليا، وفي دقايق كانت الخناقة وصلت لحماتي. دخلت علينا وقالت إيه اللي حصل؟ ولما عرفت، بدل ما تهدي الموضوع، بصتلي وقالت يا بنتي اعملي خاطرها، يعني السمك أهم من أخت جوزك؟ قولتلها أنا عملت خاطرها كتير، لكن مش معنى كده إنها تحددلي أطبخ إيه في بيتي. طبعًا الكلمة دي ما عجبتش حد. وبعدها الموضوع وصل لجوزي، ولما رجع وحكيت له اللي حصل، قاللي معلش اعمليه اليوم اللي هي مش موجودة فيه، عشان خاطري. سكت. مش عشان أنا مقتنعة إني غلطانة، لكن عشان مش عايزة خناقة صغيرة تكبر وتبوظ علاقتنا كلنا. بس من جوايا كنت متضايقة. هو ليه دايمًا المطلوب مني أنا اللي أراعي؟ ليه أنا اللي أغير أكلي وأحسب مواعيدها وأستنى غيابها؟ أنا مش بطلب منها تاكل السمك، ولا حتى بدخل عليها بأكلة هي مش بتحبها. أنا بس بطبخ في بيتي. ومن يومها قررت إني مش هعتذر عن حاجة أنا شايفة إني ما غلطتش فيها. وقلت لجوزي أنا هراعيها لما أقدر، لكن مش هعيش وأنا خايفة أطبخ إيه عشان محدش يزعل. وعدى اليوم، وافتكرت إن الموضوع خلص. لكن تاني يوم، وأنا قاعدة في البيت، سمعت خبط جامد على الباب. فتحت لقيت حماتي قدامي، وسلفتي واقفة وراها. بصيت لهم باستغراب وقلت خير؟ حماتي دخلت من غير ما ترد، وقعدت على الكرسي في الصالة. أما سلفتي، فضلت واقفة عند الباب، وبصتلي بنظرة غريبة عمري ما شوفتها منها قبل كده. وبعدين حماتي قالت جملة واحدة بس جملة خلتني أنسى تمامًا موضوع السمك، وأفكر في كل كلمة اتقالت بينا اليوم اللي فات من جديد. ولحد اللحظة دي، أنا مش عارفة إذا كنت لو سمعت كلامهم من الأول كنت هفضل مصممة على موقفي، ولا كنت هتمنى إني ما دخلتش المطبخ اليوم ده أصلًا. حماتي بصت لي وهي بتاخد نفسها بصعوبة، وحطت إيدها على ركبتها، وقالت بصوت واطي بس فيه نبرة تقيلة نزلت عليا زي المية الباردة سارة حامل يا إيمان، والدكتور قال الحمل ضعيف جدًا وأي ريحة نفاذة أو مجهود ممكن يضيع العيل، وهي بقالها أربع سنين بتلف على الدكاترة وساكتة، وأنا حلفتها ما تنطقش لحد ما يثبت. وقفت متسمرة في مكاني، عيني راحت لحماتي وبعدين لسارة اللي كانت واقفة عند الباب، ملامحها مكسورة، عينيها حمر من العياط، مش نفس البنت اللي كانت واقفة إمبارح بتزعق وتهاجم بغل غريب. في ثانية واحدة، حسيت بدوخة، كأن الأرض بتلف بيا. طب وليه؟ ليه ساكتة كل ده؟ وليه خلت الموضوع يبان إنه تحكم وقلة ذوق وعناد؟ حماتي كملت كلامها وهي بتبص في الأرض ما كناش عايزين نقول لحد عشان العين، والولدين اللي راحوا منها زمان وانتي عارفاهم الدكتور حذرها وقال لها ريحة الزفارة والمقليات دي بالذات بتقلب بطنها وتعمل لها تقلصات شديدة. إمبارح لما رجعت ولقت الريحة قلبت بطنها، فضلت ترجع طول الليل ونزل عليها نقطتين دم، وجوزها جه الفجر خدها وجريوا على المستشفى، ولولا ستر ربنا كان زمان الضنى راح. حسيت بلساني مربوط، الأكسجين انسحب من الصالة فجأة. أنا مش شريرة، ولا عمري كنت قاسية، وموقف زي ده هد حيلي تمامًا. بس في نفس الوقت، كان فيه حاجة جوايا بترفض السيناريو ده كله، مش عشان مش متعاطفة، لأ، عشان أنا طول عمري عايشة معاهم في نفس العمارة، وسارة أبعد ما تكون عن الهدوء والستر في الحاجات دي. سارة لما صباع رجلها الصغير بيخبط في الباب بتعمل مناحة ويومين عيا وتطلب دليفري وتشتكي للدنيا كلها. إزاي تبقى حامل وفي خطر وساكتة كل الشهور دي؟ وليه طريقة التعامل معايا من أول يوم كانت بالشتيمة والهجوم مش بالرجاء؟ سلفتي اتحركت خطوة لجوة، وقفلت الباب وراها ببطء، ودموعها نزلت أنا ما كنتش عايزة أقولك يا إيمان، عشان مش عايزة أسمع كلمة مبروك وتطلع فال وحش عليا، وعشان انتي ربنا كرمك وورا بعض ما شاء الله، ما كنتش عايزة أحس إني بطلب منك شفقة ولا تقولي مستكترين علينا الأكلة. بس انتي إمبارح قسيتي عليا، قسيتي وأنا كنت بمو.ت. بلعت ريقي بصعوبة، وبصيت لهم الاتنين. كنت محتارة بين إني أعتذر وأجري أح.ضنها وأقولها فداكي أي حاجة، وبين صوت خافت جوايا بيقولي فيه حاجة غلط. بس العاطفة غلبت، ووجع الأمومة اللي أنا مجرباه خلاني أتنازل في لحظة. قربت منها ومسكت إيدها ألف بعد الشر عليكي يا سارة، والله العظيم ما كنت أعرف، لو كنتي قولتيلى نص كلمة والله ما كنت دخلت سمكاية واحدة البيت كله مش شقتي بس، ليه شيلتيني ذنب أنا ماليش يد فيه؟ ليه جيتي عليا بالصوت العالي إمبارح؟ حماتي اتنهدت بصوت عالي وقالت خلاص يا بنتي، اللي حصل حصل، إحنا جينا نصفي النفوس، بس المهم دلوقتي الحمل يكمل على خير، والدكتور مانعها من الحركة خالص، ولازم راحة تامة، ومفيش وقفة في مطابخ ولا أكل تقيل، وأنا صحتي على قدي زي ما انتي شايفة ورجلي مش شيلاني. هنا بقى بدأت أحس بالخيط التاني في الحكاية. بصيت لحماتي وقولتلها أكيد طبعًا يا ماما، ربنا يتمم لها على خير وتقوم بالسلامة. حماتي عدلت طرحتها وقالت ببساطة غريبة عشان كده بقى يا إيمان، إحنا قفلنا مطبخها خالص، وهي هتفضل نايمة على ضهرها، وأكلها وشربها وعلاجها ومصالح شقتها هتبقى عليكي انتي لحد ما تعدي التلات شهور دول، ما هو انتي زي أختها، وإحنا ملناش غير بعض في البيت ده، وطالما إحنا في بيت عيلة واحد يبقى نشيل بعض. الكلمة نزلت عليا زي الصاعقة. خدمة كاملة؟ شقتها وأكلها وعلاجها ومصالحها، وأنا اللي عندي طفلين في المدارس ومسؤوليات وطلبات جوزي؟ وفوق كل ده، هي كانت بتعاملني بجفاء وقرف طول السنتين اللي فاتوا، ودلوقتي الموضوع اتحول فجأة لفريضة عليا إني أشيل بيتها بالكامل؟ بصيت لسارة، لقيت نظرة الدموع اختفت شوية، وظهرت بدالها نظرة ترقب، نظرة واحدة مستنية تشوف أنا هقول إيه وهل هعرف أرفض قدام الست الكبيرة ولا لأ. قولت بهدوء وأنا بحاول أوزن كلامي أنا عنيا ليها في اللي أقدر عليه يا ماما، أبعتلها أكل من اللي بعمله لبيتي، أنزل أروق لها ترويقة خفيفة كل يومين، إنما شيل كامل أنا مش هقدر، انتي عارفة عيالي ومذاكرتهم وظهري التعبان. وش حماتي اتقلب في ثانية، النبرة الحنينة الحزينة اتبخرت، وقالت بحزم أكل من اللي بتعمليه لبيتك إيه يا بنتي؟! بقولك الدكتور كاتب لها على نظام أكل معين، شوربة خضار فريش، مسلوق، عصاير طبيعية كل ساعتين، مفيش بصل مسبك ولا دهون ولا حاجة تقلب بطنها. انتي هتستخسري في مرات أخو جوزك؟ هو ده رد الجميل؟ دا أنتوا لحمكم من خير بعض، وجوزك لو عرف إنك بتترددي في خدمة سلفتك وهي في الحالة دي هياكل وشك! الكلام وجعني، وحسيت بإهانة مباشرة. يعني أنا اتهمت إني معنديش دم إمبارح، والنهارده بيتحط عليا فرض عين إني أكون شغالة لبيتها عشان غلطة هي اللي بدأتها لما خبت عليا، وفوقها بيتهدد بيا جوزي! سارة اتكلمت بصوت فيه مسكنة زيادة عن اللزوم خلاص يا حماتي، ما تضغطيش عليها، أنا هتحمل وخلاص، ولو الضنى نزل تاني يبقى نصيبي، ربنا يعوض عليا، مش عايزة أتقل على حد. الدراما كانت عالية أوي، ومتقونة لدرجة تخنق. بصيت لها وقولت يا سارة متقوليش كده، ربنا يقومك بالسلامة ويحفظلك جنينك، أنا هعمل اللي في وسعي ومفيش تقل ولا حاجة. نزلت حماتي وسارة معاها بالراحة على السلم، كأنها ماشية على بيض، وأنا قفلت الباب وسندت ضهري عليه وأنا باخد نفسي بالعافية. دخلت المطبخ اللي كان لسه فيه أطباق الفطار، لقيت نفسي تايهة. ريحة السمك كانت راحت من البيت لأني مسحت بكلور وفينيك وبخرت من الصبح، بس ريحة تانية وحشة بدأت تظهر في الجو ريحة استغلال صريح متغلف بوجع وخوف. المغرب جه، وجوزي رجع من الشغل. أول ما دخل من الباب، لقيته باصص لي بصه غريبة، لا سلم ولا اتكلم، قلع جزمته ودخل الصالة ورزع مفاتيحه على الترابيزة. وقفت قدامه وقولتله مالك يا طارق؟ في إيه؟ بصلي وقال بعتاب تقيل بقى سارة حامل وفي خطر يا إيمان، وانتي الصبح تقفي تعاندي مع أمي وتقولي مش فاضية أخدمها؟ هي دي الأصول اللي اتربيتي عليها؟ الناس تايهين في مستشفيات ودكاترة من الفجر، وانتي شاغلة بالك بالمذاكرة والعيال؟! حسيت بدمي بيفور أنا قولت كده؟! مين اللي قالك الكلام ده؟ أنا قولت هعمل اللي أقدر عليه، بس هما عايزين خادمة مقيمة بشروط خاصة! وبعدين هي ليه خبت عليا أصلاً من البداية؟ لو كانت قالتلي إنها حامل، هو أنا كنت هفكر أعمل حاجة تضايقها؟ ليه سابتني أبان وحشة إمبارح والنهارده تعملني أنا المذنبة؟ طارق ض.رب بإيده على الترابيزة وقال بنفاد صبر خافت من العين يا سارة! الست سقطت مرتين قبل كده، حقها تخاف ولا مش حقها؟! المهم دلوقتي مش مين قال ومين عاد، أخويا كلمني وهو منهار في التليفون، قالي مراتي أمانة في رقبتكم انت ومراتك، أمي ست عجيبة مش هتقدر، وانتي اللي موجودة في العمارة. شقتهم هتتنضف كل يوم، وأكلها ينزل في مواعيده بالمسطرة، ومش عايز أسمع مشاكل تاني، الموضوع مش مستحمل هبل نسوان! قربت منه وبصيت في عينيه وقولت بصوت واطي ومرجف هبل نسوان؟ يعني أنا بعد التعب ده كله يطلع عليا هبل نسوان؟ ماشي يا طارق، أنا هعمل بأصلي، بس افتكر كويس إنك بتظلمني. من اليوم ده، بدأت مرحلة تانية خالص في البيت. مرحلة كانت أصعب بمراحل من مشكلة السمك. كنت بصحى من الساعة ستة الصبح، أجهز فطار عيالي واللانش بوكس، أوديهم المدرسة، أرجع جرى على شقة سارة. كنت أنزل بالمفتاح اللي حماتي أصرت إني آخده عشان ما أزعجهاش بالتخبيط. أدخل بالراحة، ألاقيها نايمة ومغيمة الأوضة بالتكييف والستاير. أدخل المطبخ بتاعها، أعملها الفطار الخاص بيها بيض مسلوق، عصير برتقال فريش معصور في وقته، توست بني. أطلعلها الأكل لحد السرير، تصحى، تبص في الصينية بقرف وتقول البيض ده مش مستوي كويس يا إيمان، البرتقال فيه مزازة، معدتي هتتعب، ارميه واعمليلي تفاح بيوريه أحسن. كنت أبلع الإهانة وأقول في بالي معلش، هرمونات حمل وضعيفة. أروح أعمل اللي طلبته، وبعدين ألم الزبالة، أمسح الشقة، أغسل الغسيل بتاعها وبتاع جوزها، وأطلع شقتي ألحق أعمل أكل بيتي وأذاكر للعيال. الموضوع استمر أسبوعين على الحال ده، وأنا حيلي اتهد. خسيت، وعيالي بدأوا يشتكوا إني مش بقعد معاهم، وجوزي كل ما يرجع يلاقي البيت مكركب يقولي انتي مهملة في بيتك ليه؟ ولما أقوله كنت تحت يزعق ويقول ما كل الستات بتشيل بعض، انتي بتمني علينا؟! في نص الأسبوع التالت، حصل الموقف اللي قلب الموازين كلها وخلاني أقف على رجلي. كان يوم جمعة، وجوز سارة كان مسافر مشوار شغل تبع شركته في إسكندرية وراجع بليل، وطارق جوزي كان نازل يصلي الجمعة ويقعد على القهوة شوية مع صحابه. نزلت كالعادة عشان أديها علاج الساعة اتناشر وأشوف طلباتها. فتحت باب الشقة بالمفتاح براحة عشان ما أزعجهاش. الشقة كانت هادية خالص، وصوت التلفزيون في الصالة مقفول. مشيت في الطرقة براحة متجهة لأوضة النوم، وكنت ماسكة في إيدي علبة العلاج اللي اشتريتهولها من الصيدلية الصبح بفلوسي أنا ومحدش قالي حتى خدي تمنه. وأنا بقرب من الأوضة، سمعت صوت ضحك! ضحك عالي ورنان، صوت واحدة فايقة ورايقة جدًا ومبسوطة على الآخر. وقفت مكاني مذهولة. الصوت كان جاي من جوة الأوضة، وسارة كانت بتتكلم في التليفون ههههههههه، يا بنتي بطلي بقى همو.ت من الضحك، والله العظيم فكرة جهنمية، أمك دي دماغها توزن بلد! ما كنتش مصدقة إن الحوار هيبلعوه كده! وقفت ورا الباب، قلبي كان بيدق في وداني زي الطبلة. مسكت مقبض الباب وسكت خالص، وحبست أنفاسي. سارة كملت كلامها وهي بتتحرك في الأوضة، وصوت كعب شبشبها كان بيخبط في الأرض بخفة ونشاط مفيش فيه أي أثر لواحدة نايمة على ضهرها وبتمو.ت يا بنتي حمل إيه بس فال الله ولا فالك، أنا مش ناقصة هم دلوقتي! إحنا روحنا للدكتور عشان نعمل فحوصات عادية أصلًا عشان التأخير، لقى عندي كيس مية صغير خالص قالي هيروح مع العلاج ومفيش أي حمل ولا نيلة! بس أول ما روحت وحكيت لماما على خناقة السمك وإن إيمان دي حاطة راسها براسي وعايزة تفرض شخصيتها عليا، ماما قالتلي دي فرصة نكسر مناخيرها ونعلمها الأدب. قالتلي قولي لحماتك إنك حامل وتعبانة، وخليها هي اللي تتصدر للولا طارق، وطارق أصلًا أهبل وبيسمع كلام أمه، وبكده نض.رب عصفورين بحجر نقعدك ست هانم مخدومة ومكرمة، ونعلم سلفتك إزاي تعرف حجمها وتخدمك برضاها وغصب عنها! كنت واقفة مسمرة، الدم هرب من وشي كله، وإيدي اللي ماسكة كيس الدوا كانت بتترعش من الغيظ والقهر. سارة كملت وهي بتمط في الكلام بمياعة والله العظيم يا هبة لو شوفتيها، شكلها يفطس من الضحك! بتنزل الصبح وشها أصفر وتكنس وتمسح وتغسلي حتى الهدوم الداخلية! وعاملة فيها الملاك الرحيم، وجوزها بينزل يبوس على راسي ويقولي معلش حقك علينا لو إيمان قصرت! يا بنتي والله العظيم هفضل مكملاها شهرين كمان لحد ما أزهق، وبعدين نعمل نفسنا سقطنا ونلبسها هي الليلة ونقول من ريحة أكلها ولا عينها الوحشة! في اللحظة دي، حسيت بنار ولعت في نافوخي. كل التعب، كل الإهانات، كل النظرات اللي جوزي بصهالي كأني ست بلا قلب، بهدلتي قدام حماتي، صحتي اللي راحت في الترويق والمسح وطبيخ الهوانم، كل ده كان مجرد مسرحية رخيصة معمولة عشان يتكسر مناخيري؟! إيدي اتحركت لوحدها ودفعت باب الأوضة بكل قوتي. الباب خبط في الحيطة بصوت رزع هز الشقة كلها. سارة اتنفضت من على السرير، التليفون طار من إيدها ووقع على السجادة، وهي وقفت مبرقة وعينيها متبتة فيا، وشها قلب أبيض زي الجص، كأنها شافت عزرائيل واقف قدامها. وقفت في مدخل الأوضة، بصيت لها من فوق لتحت، مفيش أي أثر لتعب، حاطة ميكب خفيف في وشها، وشعرها معمول، ولابسة بيجامة شيك، والضحكة كانت لسه مرسومة على شفايفها قبل ما تتجمد من الرعب. قولتلها بصوت واطي جدًا، نبرة هادية بس كانت أرعب من أي زعيق بقى كيس مية يا سارة؟ ومسرحية عشان تكسروا مناخيري؟ سارة بلعت ريقها وبدأت تتلجلج، حاولت تقعد بسرعة على السرير وتعمل نفسها دايخة وتغمض عينيها إيمان… انتي فهمتي غلط… أنا كنت… كنت بهزر مع صحبتي… أنا دايخة مش قادرة أقف… الحقي… قربت منها بخطوات بطيئة، وبدل ما أصرخ أو أمد إيدي عليها، وطيت على الأرض وجيبت التليفون بتاعها اللي كان لسه مفتوح والخط شغال ومكتوب عليه اسم أختها هبة. حطيت التليفون على ودني وقولت ببرود تام سلميلي على أمك يا هبة، وقوليلها فكرة جهنمية فعلًا، بس للأسف، النهاية مش هتعجبكم خالص. قفلت الخط في وش أختها، وبصيت لسارة اللي كانت بترتعش بجد المرة دي، بس من الخوف والفضايح مش من الحمل. رميت كيس الدوا على السرير في وشها وقولتلها قسماً برب العزة يا سارة، لو شوفت خيالك في شقتي، أو سمعت صوتك طالع، أو حاولتي تفكري إنك هتعملي عليا نمرة تاني، لهخلي العمارة دي كلها، وعيلتك، وجوزك اللي مأمنك على شرفه وبيته، يسمعوا التسجيل اللي كان بيسجل في جيبي دلوقتي حالا. سارة عينيها برقت برعب وقالت بصوت مخنوق انتي… انتي سجلتيلي؟! ما رديتش عليها، ابتسمت نص ابتسامة وسيبتها وخرجت. بس الغضب اللي كان جوايا ما كنش رايح لسارة بس، الغضب الحقيقي كان رايح لحماتي، ولجوزي اللي هانني وصغرني وخلاني خدامة لناس بتتسلى بيا. طلعت شقتي، قفلت الباب بالمفتاح، وقعدت في الصالة. كنت برتعش من كل حتة، بس كان في هدوء مخيف بدأ يحل محلي. أنا مش الست اللي بتعيط وتندب حظها، ولا اللي بتستنى جوزها يرجع عشان تتخانق معاه فيطلعها هي الغلطانة والمفترية. الساعة كانت داخلة على اتنين بعد الظهر. صوت طارق وهو طالع على السلم كان مسموع، بيصفر ومبسوط بعد ما خلص قعدته مع صحابه. سمعت صوت باب الشقة بيتفتح، دخل ورمى السلام وهو مبتسم إيمان، اعمليلي كوباية شاي ونبي، اليوم كان حلو برا والجو جميل. بصيت له، ملامحي كانت جامدة تمامًا، ومردتش عليه. قرب مني باستغراب وقال مالك قاعدة كده ليه؟ في إيه؟ سارة تعبت تاني ولا إيه؟ أوعي تكوني اتخانقتي معاها؟! وقفت وبصيت في عينيه مباشرة، وقولتله جملة واحدة بس خلت ابتسامته تقع، وخلت الدم يهرب من عروقه زي ما هرب من وش سلفتي تحت أمك وأخوك وسلفتك، قدامك عشر دقايق تلمهم في الصالة هنا يا طارق، يا إما البوليس هو اللي هيلمنا كلنا في القسم النهاردة بتهمة النصب والابتزاز، والشهادة معايا في جيبي يتبع طارق فضل واقف مكانه متنح، وبص لي كأنه شايف واحدة تانية غير مراته اللي بيعرفها، واحدة ملامحها اتحولت لحجر وعينيها فيها شرار حقيقي. ضحك ضحكة مهزوزة كأنه بيحاول يطمن نفسه إن الموضوع هزار: إيه اللي بتقوليه ده يا إيمان؟ بوليس إيه وقسم إيه في يوم جمعة؟ انتي اتجننتي؟ فيه واحدة عاقلة تقول على أهل جوزها نصابين وبتوع ابتزاز؟! قربت منه خطوة واحدة، وصوتي كان واطي لدرجة إنه طلع أهدى من الهمس، بس كان بيقطع زي السكين: أنا مجنونة؟ تمام، رن على أخوك يوسف دلوقتي حالا وقوله يجي، ورن على أمك تطلع. قدامك بالظبط تسع دقايق، لو الدقيقة العاشرة دخلت وما لقيتهمش قاعدين قدامي، أنا اللي هنزل على القسم، وأول ورقة هرفعها هي محضر ضد سارة وأختها وأمها بالصوت المسجل، وتاني ورقة قضية خلع يا طارق، واليمين اللي هحلفه في المحكمة مش هيرجع فيه مخلوق! طارق وشه اتقلب تمامًا، عرف إن في كارثة حقيقية، وإن الهوا المرة دي مش هزار نسوان ولا خناقة طبيخ. طلع تليفونه من جيبه وإيده كانت بتترعش شوية من غير ما يقصد، وطلب أخوه يوسف وقال له بنبرة متوترة: يوسف، انت وصلت من إسكندرية؟… طب اطلع لشقتي حالا… لا ما تسألش، اطلع إنت وسارة وأمي كمان، إيمان قالباها حريقة هنا ولازم نلم الموضوع. قفل مع أخوه، وبص لي وهو بيبلع ريقه بعصبية: أمي ست كبيرة يا إيمان، لو قللتي أدبك عليها أو جيتي جمبها بكلمة توجعها… قاطعته قبل ما يكمل: أنا عمري ما قللت أدبي ولا هقلله، الأصول أنا عارفاها كويس، بس الأصول لما بتتداس من أهل البيت، يبقى مفيش احترام لحد، استنى وشوف بعينك عشان تعرف مراتك كانت مستحملة إيه. عشر دقايق بالظبط، وكان الباب بيخبط. فتح طارق، ودخل يوسف أخوه لسه لابس هدوم السفر والشنطة على كتفه، وراه حماتي ساندة على عكازها ولابسة إسدال الصلاة، وفي الآخر خالص كانت سارة داخلة بتتسحب، عينيها في الأرض، وشها شاحب كالمو.تى، وجسمها كله بيرتعش، كانت متبتة في ديل جلابية حماتي كأنها بتستخبى منها أو منها فيا. حماتي دخلت قعدت على نفس الكرسي اللي قعدت عليه يوم ما أعلنت الحمل المزعوم، وبصت لي بغضب مكتوم وقالت: خير يا ست هانم؟ طارق منزلنا على ملا وشنا ليه في ساعة صلاة الجمعة؟ هو إحنا ما بقاش ورانا غير حكاياتك؟ ما تسيبي سارة ترتاح في سريرها! يوسف رزع الشنطة على الأرض وقال بلهفة وقلق: في إيه يا جماعة؟ سارة فيها حاجة؟ الحمل جراله حاجة وإنا مسافر؟ إيمان انتي كلمتيها؟ بصيت لسارة، لقيتها وطت راسها في الأرض أكتر، وأصابعها كانت بتفرك في بعضها برعب. ابتسمت ابتسامة باردة جدا، ووقفت في نص الصالة، وسطهم كلهم، ومسكت تليفوني في إيدي. قولتلهم: سارة كويسة وزي الفل يا يوسف، وصحتها أحسن مني ومنك ومن الكل، سارة أصح واحدة في العمارة دي! طارق زعق بنفاد صبر: انتي هتنقطينا بالكلام؟! انطقي قولي في إيه وخلصينا، مش قولتيلى فيه كلام خطير؟! قولتله بهدوء تام: أنا ما بتكلمش كتير، أنا هسمعكم حاجة صغيرة خالص، تسجيل مدته تلات دقايق، هدية من سلفتي المصونة وأختها هبة وست الحبايب حماتي اللي متفقة معاهم. حماتي أول ما سمعت جملتي اتنفضت على الكرسي، وسارة فجأة صرخت برعب: لأ يا إيمان!! وحياة ولادك بلاش!! خلاص، أنا هقول كل حاجة!! يوسف تنح وبص لسارة باستغراب: تقولي إيه؟! فيه إيه يا سارة؟! سارة قعدت على الأرض منهارة، بتعيط عياط هستيري وبتغطي وشها بإيديها. حماتي وشها اصفر، بس حاولت تتماسك وقالت بصوت متقطع: انتي… انتي بتتبلي على البت وهي عيانة، يوسف، متسمعش كلام مرات أخوك، دي غيرانة من سارة عشان… قبل ما حماتي تكمل، ضغطت تشغيل في التليفون. الصوت طلع واضح ونقي، مفيش فيه أي شك، صوت ضحك سارة الرنان اللي كان بيجلجل في التليفون: “يا بنتي حمل إيه بس فال الله ولا فالك، أنا مش ناقصة هم دلوقتي!… كيس مية صغير خالص… أول ما روحت وحكيت لماما على خناقة السمك وإن إيمان دي حاطة راسها براسي… ماما قالتلي دي فرصة نكسر مناخيرها ونعلمها الأدب… نض.رب عصفورين بحجر: نقعدك ست هانم مخدومة ومكرمة، ونعلم سلفتك إزاي تعرف حجمها وتخدمك برضاها وغصب عنها!… بتنزل الصبح وشها أصفر وتكنس وتمسح وتغسلي حتى الهدوم الداخلية!… وجوزها بينزل.. نعمل نفسنا سقطنا ونلبسها هي الليلة ونقول من ريحة أكلها ولا عينها الوحشة!” الصوت كان مالي الصالة، الكلمات كانت بتنزل زي الرصاص على كل واحد فيهم. طارق فضل مبحلق في الشاشة، وشه قلب أحمر وبعدين أزرق، كأن الدم اتجمد في عروقه. يوسف، جوز سارة، كان مذهول تمامًا، شفايفه بتتحرك من غير صوت، وبص لمراته اللي مرمية على الأرض وهي بتعيط، كأنه مش قادر يستوعب إن دي الست اللي بيلف بيها على الدكاترة من سنين وبيبكي على رجليها عشان نفسها في ضنى. التسجيل خلص. سكون تام ساد الصالة، سكون يقطع النفس، مكنش مسموع فيه غير صوت شهقات سارة المكتومة. بصيت لطارق، وقولتله وأنا بشاور عليها: هو ده هبل النسوان يا طارق؟ هي دي الأصول اللي اتربيت عليها؟ شيلتني هم وذنب إني ضيعت عيل مش موجود أصلاً، خليتني خدامة بتمسح وتغسل وتطبخ بالمسطرة لواحدة بتضحك عليا في التليفون وبتقول لصاحبتها إني هبلة وغبية ومناخيري اتكسرت؟! هان عليك وتيجي تقولي مهملة في بيتك وتزعقلي قدام عيالي، وكل ده عشان كذبة حقيرة معمولة عشان حتة أكلة سمك؟! طارق مكنش قادر يحط عينه في عيني، وشه نزل في الأرض تمامًا، جسمه كان بيرتجف من الخزي. أما يوسف، فكان الصدمة عنده مضاعفة ألف مرة. قرب من سارة ببطء، صوته كان مرعوب ومكسور: سارة… الكلام ده بجد؟ انتي مفيش حمل؟ انتي كنتي بتكذبي عليا أنا كمان؟! كنتي بتخليني أسافر وأنا قلبي واكلني عليكي عشان كيس مية؟ وعاملة نمرة عشان تكسري مناخير سلفتك؟! سارة زحفت ومسكت رجل يوسف وهي بتبكي بدموع حقيقية المرة دي: يوسف والله العظيم أمي هي اللي قالتلي، الشيطان شاطر، أنا مكنتش أقصد أوجعك، كنت متغاظة منها، والله العظيم كنت خايفة أقولك إن مفيش حمل فتزعل، أمي قالتلي خليهم يخدموكي ويفرحوا بيكي شوية! يوسف نفض رجله من إيدها بعنف، وصوته علي بهستيريا: تفرحي بإيه يا بجحة؟! بوجع قلبي؟ بلهفتي على ضنا بقالي أربع سنين بدعي بيه في كل سجدة؟! انتي تتاجري بوجعنا وبكسرة قلبنا عشان حقد نسوان وكيد عمى؟! دا أنا كنت مستعد أبيع هدومي عشان أدفع مصاريف الدكاترة ومثبتات الحمل اللي بتشحتيها! حماتي حاولت تتدخل، وصوتها كان بيرجف بس فيه مكابرة: يا يوسف يا ابني، اهدى، الست لما بتتحرم من الخلف بتعمل أي حاجة، هي كانت متضايقة وغلطت، عديها عشان خاطر… يوسف لف لأمه وبصلها بنظرة عمري ما شوفتها في عيني ابن لأمه: أعدي إيه يا أمي؟! وانتي كنتي عارفة؟ انتي كنتي عارفة إنها بتكذب وشاركتي في الفيلم ده؟ جيتي تقولي لطارق خلو بالكم منها وخلوا إيمان تخدمها؟! انتي ترضي حد يعمل كده في بناتك؟! ترضي بنتك تبقى قاعدة مخدومة بالكذب ومسخرة سلفتها وبتضحك عليها وعلى جوزها؟! حماتي سكتت، ملقتش كلمة واحدة ترد بيها، حطت وشها في الأرض وهي بتتنفس بسرعة وعكازها بيخبط في السجادة برعشة إيدها. أنا وقفت قدامهم كلهم، وقولت بكل هدوء وبنبرة مفيهاش أي تردد: أنا حقي جه قدام ربنا وقدامكم كلكم. وعشان تبقوا عارفين، أنا لا بلغت بوليس، ولا شيرت التسجيل ده عند حد، ولا فضحتم في العمارة زي ما كنتوا ناويين تفضحوني وتقولوا سقطت بسببي. أنا بنت ناس ومتربية، وبعرف أصون البيت اللي دخلته حتى لو أهله ما صانوش كرامتي. بصيت لسارة وقولت: انتي يا سارة، ليكي رب يحاسبك على النعمة اللي بتلعبي بيها وبتكدبي باسمها، وأنا ماليش دعوة بيكي من اللحظة دي، لا ليكي سلام عندي ولا كلام، وشقتك دي عتبتها محرمة عليا ليوم الدين، لو شوفتك ماشية على السلم قدامي، هعتبر نفسي شايفة هوا. وبعدين لفيت لحماتي: وانتي يا ماما، كنت بحترمك زي أمي وبشيلك على راسي، بس اللي يرضى لمرات ابنه الإهانة ويساعد في كسرها عشان خاطر التانية، يبقى معندوش عدل. بيتك مفتوح لعيالك، لكن أنا كفايتي من المجاملات لحد هنا، مش هتشوفي مني قلة أدب، بس برضه مش هتشوفي مني الود القديم. وأخيرًا، بصيت لطارق. طارق كان واقف زي التايه، بصلي وعينيه مليانة ندم واعتذار: إيمان… أنا مكنتش أعرف، أنا أسف، حقك عليا، أنا كنت فاكر… قاطعته بحزم: انت كنت فاكر إني أنا الحيطة المايلة يا طارق. كنت دايمًا تطلب مني أنا اللي أضحي، أنا اللي أستحمل، أنا اللي أعدي عشان المركب تسير، لحد ما المركب داست على كرامتي وكسرتني. لو انت شايف إن رجولتك تسمح إن مراتك تتهان ويتضحك عليها وانت تقف ضدي، يبقى إحنا ملناش عيشة مع بعض. طارق مسك إيدي بلهفة قدامهم كلهم، وصوته كان مكسور: لأ يا إيمان، متقوليش كده، والله العظيم ما هسمح لمخلوق يقرب منك تاني، ولا حد هيدخل شقتك ولا يطلب منك مليم ولا خدمة، انتي ست البيت ده وتاج راسي، وأنا اللي هردلك اعتبارك قدام الكل. يوسف كان واقف مش طايق يقعد ثانية واحدة، مسك سارة من دراعها وشدها من على الأرض بقسوة وقال لها بصوت صارم: قسماً بالله العظيم يا سارة، هدومك في شنطتك دلوقتي حالا، وعلى بيت أمك اللي خططتلك، ورجوعك ليا بعد اللي عملتيه ده فيه شك كبير، عشان اللي تتاجر بضنى ميت وتستحل كرامة الناس، متبقاش أم لعيالي أبدًا! سارة خرجت وراه وهي بتصرخ وتترجاه، صوت عياطها كان مالي العمارة كلها، بس المرة دي مكنش دموع تمثيل، كان دموع الفضيحة والحسرة على اللي ضيعته بإيدها. حماتي قامت ببطء شديد، مكسورة ومحنية الضهر، خرجت من الشقة من غير ما تنطق ولا كلمة واحدة، حتى عكازها مكنش قادر يشيلها. قفلت باب الشقة وراهم كلهم. الصالة رجعت هادية تمامًا، مفيش غير صوت أنفاسي وأنفاس طارق اللي كان واقف باصص لي وعينيه كلها ندم. طارق جه قعد جمبي على الكنبة، وطى راسه وحط إيده بين رجليه وقال: أنا استاهل أي حاجة تقوليها، عميت عيني عن الحق عشان أريح دماغي، وصدقت من غير ما أفكر. حقك عليا يا أم ولادي، واللي تطلبيه عشان ترتاحي أنا هنفذه، حتى لو عايزانا نعزل من البيت ده كله وناخد شقة برة بعيد عنهم، أنا جاهز. بصيت له شوية، وشوفت في عينيه صدق الندم لأول مرة من سنين. قولتله بهدوء: إحنا مش هنعزل يا طارق، ولا هنهرب. أنا مكسرتش حاجة عشان أهرب، بيتي ده ملكي وبشقى عمرك، واللي غلط هو اللي يخجل ويستخبى. بس من النهاردة، فيه خطوط حمرا مفيش مخلوق يتعداها. لا أمك تحددلي أطبخ إيه ولا أعمل إيه في بيتي، ولا سلفتك تلمح خيالي، وانت… كلمتك معايا تبقى بحساب، وأي حاجة تخص أهلك تخصك انت لوحدك، أنا شيلت إيدي من أي التزام يخصهم. طارق هز راسه بموافقة تامة: اللي تشوفيه يا إيمان، وعهد عليا قدام ربنا مش هيتكرر الكلام ده تاني أبدًا. عدت الأيام، والعمارة اتغيرت تمامًا. سارة فضلت عند أمها أكتر من شهرين، يوسف مكنش راضي يرجعها، ومحدش كان قادر يفتح بقه معاه لأن الفضيحة كانت طالتهم كلهم، وفي الآخر رجعت بشروط مذلة، بقت تدخل وتخرج من غير ما تبص في وش حد، راسها في الأرض، وصوتها ملهوش أي أثر. حماتي عرفت إن كلمتها مابقتش تمشي عليا، وبقت تعاملني بحذر واحترام مبالغ فيه، خايفة من الكلمة ومتحاشية أي احتكاك. أما أنا، فبقيت أعيش براحتي تمامًا في شقتي. يوم الجمعة اللي بعد الحادثة دي بشهر، نزلت السوق الصبح بدري، اشتريت أحسن سمك موجود في الشادر، سمك ماكريل وبلطي وجمبري، ورجعت شقتي ونضفته، وولعت شوايتي على أعلى نار، وفتحت شبابيك الصالة والمطبخ على الآخر. الريحة ملت العمارة من أول دور لآخر دور، ريحة السمك المشوي بالتوابل والليمون والتوم، ريحة الأكل اللي ولادي وجوزي بيحبوه. وقفت في البلكونة أشم الهوا، وبصيت لتحت، لقيت طارق طالع من الصلاة ومعاه العيال بيضحكوا، أول ما شموا الريحة، ابني الصغير شاورلي من تحت وفضل يضحك ويقول: سمك يا ماما! سمك! ابتسمت من كل قلبي، وعرفت إن الحق لما بيتاخد بقوة وثبات وأدب، مفيش ريحة كيد في الدنيا تقدر تداري عليه، وإن البيت اللي بيتبني على كرامة صاحبته بيفضل عالي ومحدش يقدر يكسره.

مقالات ذات صلة

في حفله ترقيه زوجي

ابنى قال لى

انا متزوجه بقى لي 12 سنه

بعد ست سنين

دخلت اوضه راجل بقيله السبع سنين

ابي وامي

اترك تعليقاً إلغاء الرد