حرام عليك انا بقى لي شهر
”حرام عليكم! أنا بقالي شهر باجي كل يوم وبتقولولي سيستم ومواعيد! أختي بتمـ,ـوت.. الدوا بتاعها مش موجود غير عندكم في المؤسسة.. خلوني أقابل المسؤول أرجوكم!” موظف الأمن رد ببرود وهو بيشاورلها على الباب: “يا أستاذة قولتلك ألف مرة، مراد بيه مبياخدش استثناءات، الورق بيمشي بالدور.
اتفضلي بقى عشان معملكيش مشكلة واضطر أطلبلك الأمن اللي بره.” في اللحظة دي، الباب الزجاجي الرئيسي اتفتح، ودخل “مراد”. لابس بنطلون قماش أسود، وقميص كحلي غامق فاتح أول زرارين منه، من غير كرافتة. شعره الأسود الكثيف متسرح لورا بعناية، وساعة في إيده بتعكس إضاءة المكان.
ملامحه كانت صارمة، دقنه خفيفة، وعينيه البني الغامق زي الصقر.. عينين هادية جداً، بس هدوء يخوف. كان باين عليه إنه من عالم تاني، عالم ميعرفش يعني إيه كلمة “لأ”. مراد بيكره الدوشة في شركته، خطوته وقفت لما لمح البنت اللي بتعيط ومنهارة.
الكل سكت فجأة ووقف انتباه، بس نور مكنتش تعرفه، مكنتش شايفة غير قهرها وبس. قرب منهم بخطوات واثقة، وصوته الأجش الهادي طلع، بس كان كافي يخلي المكان كله يتجمد: “في إيه هنا؟” نور لفت ليه..
شافت شاب طويل، وسيم بطريقة تلفت النظر، هيبته تخطف القلب، بس الغضب كان عاميها عن أي حاجة. فكرته واحد من المديرين الباردين اللي في المكان. ”في إن مفيش رحمة!” صرخت نور في وشه، ودموعها نزلت غصب عنها: “الموظفين بتوعكم حاطين شمع على ودانهم.
. عشان الباشا الكبير بتاعكم اللي اسمه مراد ده، قاعد في برجه العاجي ومش حاسس بالناس اللي بتمـ,ـوت على باب شركته!” موظف الأمن وشه جاب ألوان، وبلع ريقه بصعوبة وكان لسه هيتكلم: “يا فندم دي…” مراد رفع إيده بحركة بسيطة سكتته تماماً.
عينه فضلت متثبتة على نور.. بصلها بفضول هادي. لأول مرة حد يهاجمه في مملكته كده، والأغرب إنها بنت رقيقة جداً، باين على لبسها البسيط وتعبها إنها شايلة جبل على كتافها. حط إيده في جيبه وقال ببرود وهو رافع حاجب: “الباشا الكبير؟
وإنتي متخيلة إن مراد الألفي ده فاضي يشوف ورق كل حالة بتدخل المستشفى بنفسه؟” نور مسحت دموعها بكم بلوزتها بعصبية وتحدي: “أومال فاتح مؤسسة خيرية ليه؟ عشان الشو الإعلامي والتصوير في المجلات؟ أختي ‘حنين’ عندها ٧ سنين ومحتاجة حقنة تمنها نص مليون جنيه!