جوزي كان بقى له ثلاث شهور
سميرة قالتلنا: “كريم كان عاوز يدخلني معاه في مشاريع مشبوهة، ولما رفضت، طلع عليا إشاعات في الشركة إني غير متزنة ومريضة لحد ما سبت الشغل.”
كريم ماكنش بيطيق إن حد يرفض يكون وسيلة لنفعه!
بعد شهر، محامي عيلة مريم والمحاسب فتحوا الخزنة الخاصة بوالدها.. ولقوا تسجيل صوتي!
صوت الحاج الله يرحمه كان ضعيف:
“أنا مش هوقع على حاجة يا كريم غير لما تفهمني مين نادية الفولي دي؟”
وصوت كريم:
“قلت لحضرتك دي كانت مراتي..”
رد الحاج:
“انت قلت لي إنها ماتت!”
والتسجيل اتحدد هنا.
التسجيل ده مع كشوفات الحسابات المزوّرة قلبت الطاولة تماماً.
شركة كريم فتحت تحقيق داخلي لما محامين عيلة مريم قدموا بلاغ رسمي بالمخالفات وشكوك التزوير.
الاستثمار اتلغى.. المنصب الإقليمي طار.. وكريم اتوقف عن العمل لحين انتهاء التحقيقات!
أنا ما شمتش فيه.. مكنتش محتاجة أشوفه مكسور، كنت محتاجة بس إنه يبطل يستخدم حياتي كقطع شطرنج.
الطلاق أخد 8 شهور.. كريم حاول يتفاوض، يهدد، يترجى، ويبكي!
آخر كلام بيننا كان في مكتب المحامين.. كنا قاعدين لوحدنا.
كان خاسس أوي وملامحه دبلانة:
— هو بجد مفيش أي فرصة أصلح اللي عملته؟
بصلته.. من شهور السؤال ده كان يكسرني، دلوقتي كان بيرهقني بس.
— إمضي يا كريم.
— أنا بتكلم عننا..
— وأنا بتكلم عن الطلاق.
جز على شفايفه وقال:
— أنا حبيتك يا نادية!
— عارفة..
اتتفاجئ وقال:
— أومال إيه؟!
— مش دي المشكلة.. المشكلة إنك طول عمرك بتحب نفسك أكتر بكتير!
اتحنيت لقدام وقلتله:
— عارف إيه اللي قتل كل حاجة جوايا ناحيتك؟
— مريم؟
هزيت راسي بالنفي:
— بابا..
بص بعيد، فكملت:
— سنة كاملة وأنا بضحك على نفسي وأقول معلش ما لحقش عزا بابا عشان الشغل.. الحياة صعبة وأحكام الشغل قاسية.. وبعدين شفتك في عزا والد مريم، سهران وواقف جنبها.. أنا مكنتش محتاجة منك تنقذ بابا، كنت محتاجة بس أحس إن في لحظة واحدة في حياتي، أنا وأهلي أهم من شغلك ومصلحتك!
كريم وطى راسه وقال بصوت واطي:
— أنا آسف..
ولأول مرة، قالها بجد من غير تحوير.. بس للأسف، جت بعد فوات الأوان.
اتطلقنا.. ورجعت حق بابا وورثي، وأخدت حقوقي المادية كلها من التسوية.
بعت البيت.. مكنتش أقدر أعيش في أؤض شهدت على كدبه، ولا أكون الست اللي بتكوي قمصان لراجل مش موجود، وبتصدق إنه في بلاد بره وهو في اللوكانده اللي جنبها!