جارتي اللي عندها 80 سنه
وهو بيبص لفوق.. ولما رفع راسه، عينيه جات في عينيا من فتحة الباب الموارب! عينين حمرا زي الجمر، مفيهاش أي إنسانة ولا رحمة!
أنا من كتر الرعب، نفسي اتقطع.. رجليا خبطت في المزهرية اللي كانت جمب الباب، اتكسرت وعملت صوت عالي جدًا!
صوت التكسير رن في الأوضة، والحاجة سُكينة لفت رأسها ليا ببطء شديد.. ببطء يمرض القلب! بصلتي وهي ماسكة بقية الكيس، وملامحها الحنونة الطيبة اختفت تمامًا، واستبدلت بابتسامة خبيثة وعينين واسعين مش طبيعيين.
قالتلي بصوتها المبحوح التاني
شفت السر يا أحمد؟ شفت اللي مكنش ينفع تشوفه يا ابن قلبي؟
الكائن اللي جوه الحفرة طلع منه صريخ عالي هز جدران العمارة كلها، وبدأ يتسلق حافة الحفرة بمخالبه وهو باصصلي وبيريل على الأرض! الحاجة سُكينة حطت ايدها على راسه ونهته وهي بتقول
مش ده يا ابني.. ده أحمد اللي بيجيبلك أكلك كل يوم.. اتقل، ميعادك مش النهاردة!
أنا مكنتش قادر أصرخ.. حاسس إن حبالي الصوتية اتقطعت، لساني أصلًا اتجمد في بقي ومش عارف أطلع أي صوت! رجعت بضهري وأنا بقع على الأرض من الخوف، وبزحف لورى كأني مشلول.. الحاجة سُكينة قربت مني بخطوات ثقيلة ومسكتني من القميص بقوة مكنش ممكن تطلع من ست عندها 80 سنة! وطت عليّ وقالت
في ودني وهي بتتنفس بسرعة
لو حد عرف باللي شفته هنا.. مش هخليك تطلع من العمارة دي عايش.. الشقة دي مقبرتك لو لسانك نطق بحرف!
ما حسيتش بنفسي بعدها إلا وأنا برة الشقة، مرمي على السلم وشي أصفر زي الميت، والمفتاح في ايدي! نزلت جري على شقتي، قفلت الباب بمليون قفل، وقعدت في الزاوية بأرتعش. جيت أصرخ، أستغيث، أنادي على أي حد.. مفيش صَوت طالع! حبالي الصوتية اتخرست تمامًا من هول الصدمة!
عدى شهر، شهرين.. وأنا محبوس في شقتي، مفيش صوت بيطلع مني، صحابي في الكلية بدأوا يدوروا عليّ، زمايلي بيجوا يخبطوا على الباب وأنا مبردش ومبفتحش لحد.. باكل بالعافية، وبشرب بالعافية، وطول الليل سامع صوت الخربشة اللي تحت الأرض جاي من شقتها! سامع صوت العضم وهو بيتكسر فوق دماغي!
خلال الشهرين دول، عرفت اقرأ لغة الإشارة بالصدفة عشان أتواصل مع الناس لما أضطر أنزل أشتري أكلي، وكل ما أعدي على الحاجة سُكينة، ألاقيها واقفة في البلكونة بتبصلي بابتسامة النصر.. ابتسامة بتقول لي أنا كتمت صوتك خلاص.