دخلت محل بيتزا

دخلت محل بيتزا بعد يوم شاق من تصوير العرايس في فرحهم الكاميرا كانت متعلقه علي رقبتي وباقي العدة شايلاهم علي ضهري ، دخلت وروحت للكاشير….
لو سمحت
اتفضلي
عايزة بيتزا سوبريم
كبيرة ولا صغيرة؟
كبيرة
تمام، الحساب 350
طلعت الفلوس واديتهاله وهو خدها وراح يعمل حاجة
كنت هروح اقعد علي طربيزة بس لفت انتباهي الشاب اللي بيعمل البيتزا عشان المطبخ مفتوح علي الكاشير وهو بيعجن العجينة
كان شاب قمحاوي وعامل شعره كيرلي، ملامحه حلوة
بس اللي لفتني اكتر فيه الحركات اللي بيعملها بالعجينة
كانت سريعة جدا وحسيت انه مستمتع وهو بيعملها
كأنه بيلعب
قررت اني اصوره عشان شكله كان حلو اقصد وهو بيعمل الحركات مخك يا عزيزي القارئ ميروحش لبعيد
رفعت الكاميرا وبدأت اخد كذا صورة ورا بعض لغاية ما لف وهو بيعمل حركة وبصلي وفجأة…
العجينة طارت علي وشي وعلي الكاميرا
فجأة جري عليا وشالها وقال
انا آسف جدا والله ماكونتش اقصد
قولتله وانا بشوف الصور اللي علي الكاميرا
افتكرتك متمكن بالحركات اللي انت بتعملها دي
هو انا متمكن فعلا بس بتوتر لما حد يبص عليا
طيب، انا صورتك تحب تشوف الصور؟
اكيد
وريتهاله وكان مبهور بيهم
زياااااااااااااد
بص وراه وكان الشاب اللي حاسبته
انت مش بتعمل البيتزا لييييه؟!
هعملها اهو بس…
قاطعه مسكه من قفاه وقاله بتوعد
حسابك معايا بعدين
فانا قولت
انا اللي كنت بوريه حاجة
اه تم…هو ايه ده يازياد؟؟!
وشاور علي العجينة اللي محطوطة علي الكاونتر
هفهمك والله
روح اعمل البيتزا يا زياااااد
ضحكت عليهم وروحت قعدت علي الطربيزة
وبعد فترة جابولي البيتزا والشاب قال
اتفضلي يا آنسة واحممم يعني بعتذرلك عن اللي زياد عمله
مافيش مشكلة، هو انتوا اخوات؟
اه، ده اخويا الصغير
ماشاء الله شاطر
فعلا
جيه صوته وهو واقف قدام الكاونتر
حد بيجيب سيرتي؟
ونط من عليه وجيه اتجاهنا وهو بيقول
ده انتِ كده ماشوفتيش مهارات، لازم تشوفيني وانا ب…
زياااااد!!!!
ارجع المطبخ!!
هقولها بس…
ارجعععع المطبخ!!
يووه، ماشي
ورجع وهو بيبصله بغيظ، حك رقبته بحرج وقالي
آسف مرة تاني، هو بس فراك شوية
لأ عادي والله ده لذيذ خالص
هو عنده كام سنة؟
26
نعم!!!
يعني مش 18!!
لأ، كله بيفتكره صغير